Proyectos

Observatoriu d’Anovación Social y Patrimoniu Cultural (HESIOD)

HESIOD ye una plataforma orientada a identificar, analizar, dar visibilidá y esparder esperiencies socialmente anovadores nel campu del patrimoniu cultural: museos, proyectos collaborativos, llaboratorios d’anovación, centros comunitarios, espacios de co-working, plataformes y procesos de co-creación, co-producción, crowdsourcing, crowdfunding, etc. Hesiod ye parte d’un proyectu d’investigación desendolcáu ente la University College London y La Ponte-Ecomuséu.

Les anovaciones sociales son idees nueves o procesos que, al empar, cubren estremaes necesidaes sociales (de xeitu más eficaz que les alternatives), contribúin a la creación de rellaciones nueves y/o collaboraciones. N’otres palabres, son anovaciones bones pa la sociedá qu’ameyoren la so capacidá p’actuar.

Equipu

Jesús Fernández Fernández

Arqueólogu y doctor n’historia pola Universidá d’Uviéu. Investigador postdoctoral na University College London. Coordinador de La Ponte-Ecomuséu.

Arqueoloxía del campesináu medieval

La Historia y la forma de construyir los rellatos y discursos históricos nunca foi nin ye inocente. La Historia remanóse, y remánase, pa dar llexitimidá a los nuesos actos del presente. Por mor d’esto rescatóse namás una parte de la nuesa memoria colectiva, quedando nel escaecimientu tolo relativo a aquellos grupos sociales que nun teníen capacidá d’influyencia nin poder: muyeres, subordinaos, esclavos, marxinaos, probes, etc., toos homes y muyeres “ensin historia”. Ente ellos tán los campesinos qu’a lo llargo de más de 1.000 años foron la fuercia de trabayu que movió Europa, que se sumen de los llibros d’Historia pa dexar llugar a los reis, les sos dinastíes, los sos conflictos d’interés, les sos guerres…

¿Qué sabemos d’ellos/es? ¿Cómo vivíen? ¿Cómo s’alimentaben? ¿Cómo se rellacionaben con otros grupos sociales? Son cuestiones a les que ye xusto dar respuesta, más allá de les fontes clásiques de conocimientu históricu, que son los documentos escritos, y recurriendo a la metodoloxía arqueolóxica, que nos remite a la cruda realidá material d’estes sociedaes.

Dende l’añu 2009 un equipu interdisciplinar de trabayu desendolca en dos aldees d’Asturies una metodoloxía de trabayu en cata de, ente otros oxetivos, recuperar información arqueolóxico sobre los grupos de campesinos que les moraron na Edá Media. Una d’estes aldees ye Villanueva, en Santu Adrianu, au n’actualidá tán faciéndose tolos años campañes arqueolóxiques pa evaluar la estensión d’un asentamientu campesín medieval descubiertu en 2010.

Equipu

Jesús Fernández Fernández

Arqueólogu y doctor n’historia pola Universidá d’Uviéu. Investigador postdoctoral na University College London. Coordinador de La Ponte-Ecomuséu.

Gabriel Moshenska

Arqueólogu y profesor d’arqueoloxía pública y arqueoloxía del conflictu (University College London, UK).

Margarita Fernández Mier

Profesora titular d’historia medieval na Universidá d’Uviéu. Miembru del conseyu científicu asesor de La Ponte-Ecomuséu.

Víctor-Esdras Garcia Blanco

Llicenciáu en bioloxía y espertu n’arqueozooloxía y arqueobotánica.

Pablo López Gómez

Máster n’arqueoloxía pola Universidá de Granada. Técnicu arqueólogu y guía intérprete de patrimoniu de La Ponte-Ecomuséu.

Archivu de la memoria oral de Santu Adrianu

Cuando recordar no pueda, ¿dónde mi recuerdo irá?
Una cosa es el recuerdo y otra cosa es recordar.
Antonio Machado.

La historia oral non solo fai posible rexistrar l’alcordanza que sigue viva na memoria colectiva d’un grupu humanu, nun ye namás una canal d’espresión de testimonios particulares o comunes, sinón que ye una fonte privilexada dende la que xenerar nuevu conocimientu. Trabayos de diversos sociólogos, antropólogos o historiadores contribuyeron a afitar la idea de qu’usar la fonte oral ye una opción historiográfica y metodolóxica válida dafechu, y güei, gracies a ello, reconozse como una de les múltiples formes posibles d’averase al conocimientu históricu.

La información recoyío per mediu d’entrevistes en Santu Adrianu ye un intentu d’apurrir información nuevo pa la construcción d’una historia más próxima a la realidá de los personaxes que la narren, dándo-yos voz frente a los grandes homes, protagonistes d’aquella otra historia, siempre ideoloxizada y manipulada.

Cola creación d’un archivu de la historia oral queremos contribuyir a caltener esta canal clásica d’espresión, que ye’l diálogu, dando protagonismu a los que güei tienen una de les mayores riqueces de la nuesa dómina, les sos alcordances.

Tradicionalmente’l papel de la persona vieya foi siempre’l de repositoriu de la memoria colectiva, daquién sabio qu’en cualquier momentu podía asesorar a les que nun teníen los sos conocimientos. Sicasí, güei la xente mayor perdió’l so papel de tresmisores de cultura. Arrequexaes nes residencies au s’almacenen como oxetos inútiles pa la comunidá, quitándo-yos con ello de la posibilidá de participar activamente nos discutinios y progresos de les sos sociedaes. Con esti pequeñu proyectu queremos caltener parte de la nuesa memoria colectiva y volver daqué protagonismu a les persones qu’inxusta y progresivamente foron perdiéndolu.

Equipu

Eva Martínez

Activista social, mediadora y editora nel Local Cambalache.

Cristina López Santa Cruz 

Vecina, co-fundadora de La Ponte-Ecomuséu y ADL nel Ayuntamiento de Santu Adrianu.

Archivo de la memoria oral de Santo Adriano