¡Celebramos 10 años de vida!

El pasáu sábadu 2 d’avientu celebremos en La Ponte-Ecomuséu’l nuesu décimu aniversariu. Nuna fiesta especial en Villanueva, xuntamos a vecinos, socios y persones qu’a lo llargo d’estos 10 años collaboraron col ecomuséu.

La celebración entamó a les 11:00 h na ilesia de San Romanu con unes pallabres de Fernando Álvarez y Sara González, primer y segunda teniente alcalde del Conceyu, Jesús Fernández, direutor del ecomuséu, y Violeta Gomis y Paloma Sánchez trabayadores del equipu. Na ilesia disfrutamos d’un conciertín de música medieval con Juan Gaspar Leal “zanfony queen” na zanfona y Jesús Fernández nel bodhrán.

La segunda parada del percorríu pelos diez años del ecomuséu foi na escavación, onde Carmen Pérez esplicó una de les estayes de trabayu que desendolca l’equipu: la investigación arqueolóxica. Na casa d’Ana María, la primer sede del ecomuséu, Cristina López, una de les sos fundadores, contó l’orixe del proyeutu y el trabayu comunitariu que se fixo a lo llargo d’esta década. Nel llavaderu, Eduardo Alonso esplicó la so esperiencia y rellación con La Ponte como vecín de Villanueva, y Eva Martínez, del equipu del ecomuséu, repasó los proyeutos que desarrollamos dende lo llocal a lo internacional venceyando’l pasáu col presente y el futuru. Pa terminar, Lucía Cerra, tamién parte del nuesu equipu, esplicó en La Veiga la importancia de les güertes dende’l puntu de vista históricu, cultural y científicu.

Al meudía, disfrutamos d’una xinta y de música en La Escuelina. A les 16:00h presentóse’l llibru especial del décimu aniversariu “La Ponte-Ecomuséu [2013-2023]” (la so descarga ta disponible calcando equí). Diseñáu pola artista Amelia Celaya, trátase d’un llibru-oxetu qu’axunta testimonios en forma de testos, semeyes, dibuxos, voces o música de persones que nestos diez años formaron parte de la comunidá de La Ponte. Cola llectura de dalgunos de los recuerdos despidimos esta xornada emotiva na que toles persones qu’asistieron pudieron llevar el so exemplar.

Dende La Ponte-Ecomuséu queremos da-y les gracies a tola xente que nos acompañó a lo llargo d’esta década y a les persones que tuvieron presentes el sábadu. Tamién queremos agradece-y la so presencia na celebración a Pablo León Gasalla, Direutor Xeneral de Cultura y Patrimoniu.

¡A por otros 10 años más!