Esposición X Aniversariu

La Ponte-Ecomuséu cumple 10 años. Esta iniciativa entamó l’andadura en 2011-2012 cola fin de reivindicar y destacar la importancia del patrimoniu de Santu Adrianu al traviés d’una xestión local, vecinal y comunitaria. Sicasí, nun foi hasta 2013 cuando se fixaron les bases del ecomuséu, s’organizaron les primeres Xornaes de Patrimoniu Cultural y s’espublizó’l primer númberu de Cuadiernu.

L’ecomuséu pasó per distintes etapes, ocupó distintos edificios y xestionó la so financiación de maneres estremaes, dende l’autoxestión hasta con subvenciones europees. Magar d’ello, siempre caltuvo la so esencia y les sos actividaes nel territoriu: alcuentros, talleres, llaboratorios d’esperimentación, visites interpretatives, escavaciones arqueolóxiques, conferencies divulgatives… poniendo’l focu nel mou de vida rural y campesín como seña d’identidá.

Cola esposición de fotografía que vais poder ver a partir del 2 d’avientu nel Centru d’Empreses El Sabil queremos dar cuenta del percorríu de La Ponte a lo llargo d’estos años. D’esta miente, tamién se quien facer un pequeñu homenaxe a toles persones que, d’una o d’otra manera, echaron un gabitu al proyeutu: tiempu, dedicación, ganes, conocimientos, recuerdos, esperiencia, esfuerciu, suxerencies, participación… Too ello foi construyendo lo que güei ye La Ponte-Ecomuséu, y lo que queremos que siga siendo nel futuru.