Novedaes del proyeutu Memories for Future pa crear Biblioteques Humanes n’Asturies

El sábadu 16 de d’avientu, na Casa de Cultura de Grau zarremos el ciclu de talleres formativos del proyeutu Erasmus+ #MemoriesforFutureEU organizáu por La Ponte-Ecomuséu y EuropImpulse Network. Una serie d’alcuentros nos que los mozos que participaron tuvieron la oportunidá de conocer y formase en diferentes aspeutos d’interés pa organizar Biblioteques Humanes.

  • El 23 de setiembre arranquemos en La Ponte-Ecomuséu, en Villanueva de Santu Adrianu. Foi una xornada na que fiximos distintes dinámiques y actividaes de presentación, y conocimos el trabayu col patrimoniu que se fai dende l’ecomuséu La Ponte.
  • Llara (Merás), Nura (L’Infiestu) y Aitana (Xixón) viaxaron del 7 al 14 d’ochobre a Córcega (Francia) pa formase na metodoloxía de les Biblioteques Humanes con otros mozos y moces europeos pa dempués poder compartir lo que deprendieron col restu’l grupu.
  • El 18 d’ochobre refexonemos de narrativa, llibros que nos prestaría “lleer” y hestories que nos gustaría escuchar con Eva Martínez en Cambalache El Local (Uviéu).
  • El 25 de payares conocimos La Benéfica de Piloña, un espaciu nuevu y referente de la cultura asturiana, onde empecemos a definir el trabayu de los próximos meses.
  • El 16 d’avientu na Casa de Cultura de Grau/Grado disfrutemos d’una formación en redes sociales y podcast que dio l’axencia de comunicación rural MelodijoPérez  p’atrayer “llectores” y tomar idees pa tresmitir les hestories de les Biblioteques Humanes.

El próximu alcuentru, que va ser online, va valinos pa planificar la primer Biblioteca Humana que ta prevista ente xineru y febreru ¡Vamos contavos novedaes d’equí a poco!

¿Qué son les Biblioteques Humanes? Son alcuentros ente persones (llibros) creaos pa conocer les sos hestories de vida. Nesti casu, trátase d’alcuentros interxeneracionales nos que queremos conocer la memoria de les persones mayores de los nuesos pueblos. La propia mocedá va ser la qu’organice les Biblioteques Humanes en distintos pueblos d’Asturies, documente y tresmita los recuerdos de xeitu creativu.

El proyeutu ye gratuitu y ta dirixíu a la mocedá d’Asturies ente los 15 y 25 años. Pa formar parte del grupu de mozos creadores de Biblioteques Humanes hai qu’inscribise. Pa más información, podéis escribinos a info@laponte.org o llamanos al 985 76 14 03 – 691 504 045.

“Peripheral Memories for Future” ye un proyeutu financiáu pol programa européu Erasmus+ sobre recuperación y curiáu del patrimoniu cultural inmaterial n’espacios rurales. Pa ello sigue la metodoloxía de Biblioteques Humanes y cuenta colos mozos como parte del procesu.