13 Sep #MemoriesForFutureEU ¡Arrincamos el 23 de setiembre en Villanueva de Santu Adrianu!
Acabáu’l periodu d’inscripción nel proyeutu #MemoriesForFutureEU pa xente mozo d’ente 15 y 25 años, préstanos comunicar que toles persones inscrites van poder participar nel proyeutu y crear Biblioteques Humanes en distintos pueblos d’Asturies.
El primer alcuentru va ser el 23 de setiembre en La Ponte-Ecomuséu, en Villanueva de Santu Adrianu, a les 11 hores. Una xornada na que vamos llevar alantre delles dinámiques y actividaes pa conocenos en persona, conocer l’ecomuséu La Ponte, Villanueva de Santu Adrianu y organizar el programa de los próximos meses. Invitamos a los asistentes a trayer merienda y pa siguir coles actividaes pela tarde. Si vas participar na actividá del día 23, confirma, por favor, la to asistencia. Si tienes cualesquier dulda, puedes escribinos a info@laponte.org o llamanos al 985 76 14 03 – 691 504 045.
Les persones que van viaxar a Córcega (Francia) del 7 al 14 d’ochobre pa formase na metodoloxía de les Biblioteques Humanes xunto a más xente mozo europeo son Llara Martínez (Merás) y Nura Granado (Piloña). Tendrán la responsabilidá de formase nes metodoloxíes del proyeutu xunto con collacios y collacies de la UE pa llueu poder compartir el so deprendimientu col restu del grupu. Por mor de la gran participación y l’atención qu’amosó la xente, nesti proyeutu, los criterios de seleición foron: la edá, vivir y estudiar/trabayar nel mediu rural asturianu y l’interés espresáu nesta iniciativa.
Queremos agradecer a los y les participantes el so interés, amás d’a les instituciones y la prensa que nos ayudaron a esparder la propuesta qu’acabó recibiendo más de 40 solicitúes de la mocedá asturiana.
#MemoriesForFutureEU ye un proyeutu d’educación non formal financiáu pol programa européu Erasmus+ que trabaya cola mocedá rural. Nos próximos 12 meses del proyeutu van crease grupos de mozos y moces que van participar n’alcuentros nos que se van poder formar como organizadores d’eventos y actividaes culturales na zona rural. L’oxetivu final del proyeutu ye crear Biblioteques Humanes en distintos pueblos d’Asturies pa contar de manera creativa les memories de los sos habitantes.