03 Pay “Una mirada desde la ciencia a la diversidad humana del pasado y el presente. Kit digital arqueológico para el aula”, un proyeutu educativu dirixíu al alumnáu del CP Padre Nicolás Albuerne.

Na Selmana de la Ciencia, segunda quincena de payares, va empezar el proyeutu educativu “Una mirada desde la ciencia a la diversidad humana del pasado y el presente. Kit digital arqueológico para el aula”, dirixíu al alumnáu del CP Padre Nicolás Albuerne. La propuesta didáutica organízase nel marcu de les actividaes del CTL (Centru de Dinamización Teunolóxica Local) y l’Axencia de Desarrollu Local de Santu Adrianu. La coordinación científica va facela dende la Universidá d’Uviéu l’investigador Jesús Fernández Fernández, cola participación del centru educativu y La Ponte-Ecomuséu.

L’alumnáu del centru va visitar los espacios arqueolóxicos del conceyu de Santu Adrianu (la Cueva’l Conde y l’abrigu de Santu Adrianu), onde van conocer de mano del equipu de La Ponte-Ecomuséu cómo vivíen les sociedaes forraxeres nel nuesu territoriu na Prehistoria. Van tener oportunidá de conocer les espresiones artístiques y teunolóxiques d’estes sociedaes y van utilizar tabletes dixitales pa crear reconstrucciones en 3D. Nel aula, y cola ayuda del profesoráu, van crear un muséu virtual que va incluyir tola información recoyida y que va sirvir como recursu educativu pal futuru.

Los oxetivos del proyeutu educativu son: promover la diversidá cultural cola comprensión de les cultures humanes del pasáu y del presente; promover la inclusión y la pluralidá al traviés del conocimientu de sociedaes contemporánees y fomentar l’usu de les TIC nel aula cola creación de recursos dixitales.