05 Jun La memoria colectiva de les muyeres de Santo Adriano, al traviés del arte
La Ponte Ecomuséu coordina un proyectu européu que nes próximes selmanes va acoyer a una compañía d’artistes franceses que van trabayar coles muyeres rurales de Santo Adriano pa reclamar el so llabor pasáu y presente. Asina, esti mes de xunu La Ponte-Ecomuséu va acoyer a trés artistes de la compañía francesa Groupe ToNNe pa una residencia de creación desenvuelta nel marcu del proyectu européu Lands Of Butterflies (Tierres de Camparines).
Mientres cuatro selmanes los artistes van trabayar xunto a la población llocal na interpretación de la memoria colectiva de les muyeres de Santo Adriano captada mientres diez talleres participativos desenvueltos coles muyeres del pueblu dende ochobre del 2022.
Al traviés de la música, el teatru, la ilustración y la creación de vídeos, el colectivu d’artistes va figurar les esperiencies y saberes axuntaos na so estancia nuna serie de pieces artístiques que van dir amosando a la comunidá cada selmana.
P’acompañar esti procesu comuñal y creativu l’ecomuséu tamién entama una serie d’actividaes sobro patrimoniu inmaterial que va dexar crear momentos y espacios d’alcuentru ente los artistes y la población llocal pa intercambiar sobro les perspectives nueves que ta xenerando esti proyectu sobro’l papel de les muyeres nes comunidaes rurales.
Dalgunes de les propuestes que se van a desenvolver a lo llargo del mes son alcuentros con artistes llocales, talleres de baille y pandereta con Paz González Mesa y de memoria oral con Xosé Antón Ambás, actividá musical de cancios de chigre y presentaciones de les obres que’l Groupe ToNNE va dir creando a lo llargo de les selmanes.
Tres d’esta esperiencia, los artistes van viaxar a Kopasker Kopásker, nel norte d’Islandia, pa conocer y poner en valor el patrimoniu inmaterial de les muyeres d’esa zona rural, onde se tán realizando talleres similares nel marcu d’esti proyectu nel norte d’Islandia, pa conocer y poner en valor el patrimoniu inmaterial de les muyeres d’esti pueblu.
Mientres esa estancia a finales de branu, dos compañeres del ecomuséu van movese a la islla p’acompañar el procesu, intercambiar información y comparar les miraes femenines sobro la forma de vida y los paisaxes culturales de dambos territorios rurales.
Lands of Butterflies ye un proyectu de cooperación europea cofinanciáu pol programa Europa Creativa y desenvueltu por La Ponte-Ecomuséu, l’asociación islandesa Landsbyggdin Lifi, Fel I Landvor y la compañía artística francesa Groupe ToNNe. Tien como oxetivos recuperar y poner en valor al traviés del arte les memories colectives de les muyeres rurales d’Europa.