Normes d’estilu p’autores

Revista Cuadiernu

1. Les llingües principales son el castellanu y l’asturianu, inda que puntualmente podrán asoleyase trabayos escritos n’otres llingües.

2. Los artículos habrán ser orixinales. Tendrán, como norma xeneral, un llargor máximu de 15 páxines en formatu de papel A4 (incluyendo imáxenes, ilustraciones y tables). El corpus principal del testu dirá en lletra Arial 12. El títulu resaltaráse con negrina, cuerpu 14; con mayúscula namás al entamu de la frase. Los subtítulos o encabezamientos marcaránse en lletra cursivo; ente comines cuando seyan cites testuales. Nun s’emplegarán en nengún casu les lletres mayúscules. Cada autor/a incluirá un resume y unes palabres clave descriptives del conteníu. Tanto’l resume como les palabres clave tendrán que se presentar n’inglés si esta nun ye la llingua principal del artículu. Tamién tien que s’incluyir un apartáu final de conclusiones. Ye precisu l’usu de términos y construcciones lliteraries inclusives y non sexistes.

3. Les figures (cuadros, mapes, gráficos y semeyes) axustaránse al estilu indicáu pal testu principal. Sedrán de máxima calidá y habrán entregase preferentemente en formatu JPG, xebraes del testu al que tarán referíes amañosamente. Toes elles ha dir numberaes en cifres arábigues, precedíes de l’abreviatura Fig. Pa les notes al pie de páxina siguiránse estes mesmes indicaciones.

4. Les cites bibliográfiques tarán inxertes nel testu (apellíos en minúscula, ensin la inicial del nome, añu y, en casos concretos, páxines precedíes de dos puntos), dexando les notes al pie de páxina pa comentarios curtios o referencies non bibliográfiques. En llibros y monografíes señalaráse’l llugar d’edición; nos congresos el llugar y fecha de celebración, llugar y añu d’edición y páxines. La bibliografía, esclusivamente la que se cita, pondráse a lo cabero del testu, axustándose al modelu de los exemplos vinientes:

• Monografía:
HERRERA WASSILOWSKY, A. (2012): La recuperación de tecnologías indígenas: Arqueología, tecnología y desarrollo en los Andes. Lima, ed. Consejo Latinoamericano de Ciencias Sociales, Universidad de los Andes.

• Artículu en revista:
SABATÉ BEL, J. (2013): “Interpretación de algunos paisajes minerales y paisajes culturales emergentes: un panorama a la luz del V Seminario Internacional de Investigación en Urbanismo”. Identidades: territorio, proyecto, patrimonio, nº 4: 5-13.

• Collaboración n’obra colectiva, congresu, etc.:
BUSTAMANTE ÁLVAREZ, M. (2012): “Las cerámicas comunes altoimperiales de Augusta Emerita”. En BERNAL CASASOLA D. y RIBERA I LACOMBA A. (eds.): Cerámicas hipanorromanas II. Producciones regionales. Cadiz, Universidad de Cadiz: 407-434.

• Recursos d’internet:
PALOMBINI, A. y PESCARIN, S. (2011): “Virtual Archaeology and museums, an italian perspective”. Virtual Archaeology Review, 4: 151-154. Disponible en: http://www.varjournal.es/vol/vol2_num4.html [Consultado: 17.04.2015]

5. La Ponte-Ecomuséu encargaráse de les correcciones ortotipográfiques y d’estilu de los trabayos que s’asoleyen comprometiéndose les/los autores a correxir una prueba.

6. Cada artículu unviaráse en formatu electrónicu al corréu info@laponte.org inxiriendo’l títulu, nome del autor y señes.

7. Los testos que tengan un llargor inferior a les 4.000 palabres publicaránse na sección de notes y pasarán per un procesu de revisión interna. Aquellos testos con un llargor superior a 4.000 palabres pasarán amás per un procesu d’evaluación esterna (pares ciegos) y espublizaránse na sección d’artículos.